திருத்தப்படாத தவறுகளும் திருத்த வேண்டிய தீர்ப்புகளும்..

பரந்து விரிந்த தமிழ் இலக்கியப் பரப்பில் எந்தளவு வளமும் செழுமையும் நிறைந்திருக்கின்றனவோ அந்தளவுக்குக் குழப்பங்களும் தவறுகளும் இடம் பிடித்திருக்கின்றன. முத்தொள்ளாயிரத்தில் இடம்பெற்ற சில பாடல்கள், கம்ப இராமாயணத்தில் இடம் பெற்ற சில பாடல்கள், பாரதி கவிதைத் தொகுப்புகளில் இடம்பெற்ற சில பாடல்கள் அந்தந்த கவிஞர்களால் எழுதப்பட்டனவா? என்ற சர்ச்சை இன்றும் தொடர்கிறது. முறையான ஆவணப்படுத்தல்களும் , பதிவுகளும் இடம்பெறாத அந்த காலத்தில் மட்டுமல்ல, நவீன தொழில்நுட்ப வளர்ச்சியினால் பெருகி விட்ட இணையத்தளங்கள், முகநூல்களில் கூட இந்த நிலை நீடிக்கிறது. வேண்டிய தகவலை விரல் நுனியால் கொண்டு வர முடிந்தாலும் தகவலின் உறுதிப்பாட்டை நிச்சயப்படுத்திக் கொள்ள இன்னமும் தேட வேண்டிய தேவை ஏற்படுகின்றது. இந்த நிலையில் தான் நீண்ட நெடுங்காலமாக தவறுதலாக அறியப்பட்டும், பதியப்பட்டும், பரவலாக பேசப்பட்டு வரும் ஈழத்து கவிதை வரிகள் இரண்டின் சொந்தக்காரரை அவரது ஐந்தாவது நினைவு நாளில் நமது இணையத்தளம் மூலம் வெளிக்கொணருகிறோம்.

முனைவர் மாவை சச்சிதானந்தன் B.A (Hons) London. M.Phil in Psychology (London) Ph. D (Jaffna) அவர்கள் ஈழத்து இலக்கிய உலகின் புகழ் பெற்ற கவிஞர் ஆவார். தும்பளை கணபதிப்பிள்ளை மாவிட்டபுரம் தெய்வானைப்பிள்ளை தம்பதிகளின் மகனான இவர், தமிழ், சமஸ்கிருதம், ஆங்கிலம் ஆகிய மொழிகளில் புலமை பெற்றவர். கவிதை மட்டுமன்றி சிறுகதைகள், வானியல், உளவியல் கட்டுரைகள் முதலான பல்துறைகளிலும் பணி செய்தவர். மதுரை பண்டிதரான இவர் அப்பட்டம் பெற்ற போது அன்றைய இலங்கை இந்திய பட்டதாரிகளில் முதலிடத்தையும் பெற்றிருந்தார் என்பதுவும், சுவாமி விபுலானந்தருக்கு ஆராச்சித்துணைவராக பணிபுரிந்தார் என்பதுவும் குறிப்பிடத்தக்கவைகள்.

இவரது ஆனந்த தேன் கவிதைத்தொகுப்பில் இடம் பெற்றுள்ள “பொன்னின் குவையெனக்கு வேண்டியதில்லை - எனைப் போற்றும் புகழெனக்கு வேண்டியதில்லை” என்று ஆரம்பமாகும் கவிதையின் ஒன்பதாவது சரணமே இன்று தமிழுலகில் பெரிதும் அறியப்பட்டுள்ள “சாகும் போதும் தமிழ் படித்து சாகவேண்டும், என்சாம்பல் தமிழ்மணந்து வேக வேண்டும்” என்ற வரிகளைக் கொண்டுள்ளது. தமிழ் உணர்வாளர்கள், பேச்சாளர்கள், அரசியல் வாதிகள் என அனைவராலும் அடிக்கடி முழங்கப்படும் இந்த வரிகள் இன்றும் பரவலாக பாரதிதாசனுடையவை என்றே சொல்லப்படுவது மட்டுமன்றி பெரும்பாலான இணையத்தளங்களிலும் அவ்வாறே பதியப்பட்டிருக்கின்றது. தமிழகத்தவர்கள் மட்டுமன்றி ஈழத்தவர்களும் இந்த வரிகள் பாரதிதாசனுடையவை என திடமாக கருதும் நிலையே காணப்படுகின்றது. சச்சிதானந்தம் அவர்கள் பற்றி ஈழத்தவர்களுக்கு பரவலாக தெரிந்திராததுவும், இந்தவரிகளின் கனல் தெறிப்பு தீவிர தமிழ் உணர்ச்சிக் கவிஞரான பாரதிதாசனுக்குத்தான் இருக்க கூடும் என்ற எண்ணமும் இந்தத் தவறுக்கு காரணமாக இருக்கலாம். எது எப்படியானாலும் இது இன்று வரையிலும் திருத்தப் படாத தவறாகவே நிலைக்கிறது.

ஓரளவே வெளிப்படுத்தப்பட்ட இந்த உண்மை பரவலாக அறியப்படவும், திருத்தப்படாத இந்த தவறு திருத்தப்பட்ட தீர்ப்பாகவும், சச்சிதானந்தம் பற்றிய தகவல்களையும் இந்த வரிகளைக் கொண்டுள்ள முழுக்கவிதையும் இந்த வெளிப்பாட்டின் மூலம் தமிழ்கூறு நல்லுலகிற்கு அர்ப்பணிக்கிறோம்.

தமிழ்க் கவிப் பித்து

பொன்னின் குவையெனக்கு வேண்டியதில்லை - எனைப்

போற்றும் புகழெனக்கு வேண்டியதில்லை

மன்னன் முடியெனக்கு வேண்டியதில்லை - அந்த

மாரன் அழகெனக்கு வேண்டியதில்லை.

கன்னித் தமிழெனக்கு வேணுமேயடா - உயிர்க்

கம்பன் கவியெனக்கு வேணுமேயடா

தின்னத் தமிழெனக்கு வேணுமேயடா - தின்று

செத்துக் கிடக்கத் தமிழ் வேணுமேயடா.

உண்ண உணவெனக்கு வேண்டியதில்லை - ஒரு

உற்றார் உறவினரும் வேண்டியதில்லை

மண்ணில் ஒரு பிடியும் வேண்டியதில்லை - இள

மாதர் இதழமுதும் வேண்டியதில்லை.

பாட்டில் ஒருவரியைத் தின்றுகளிப்பேன் - உயிர்

பாயும் இடங்களிலே என்னை மறப்பேன்

காட்டில் இலக்குவனைக் கண்டு மகிழ்வேன் - அங்கு

காயும் கிழங்குகளும் தின்று மகிழ்வேன்.

மாட மிதிலைநகர் வீதிவருவேன் - இள

மாதர் குறுநகையில் காதலுறுவேன்

பாடியவர் அணைக்கக் கூடி மகிழ்வேன் - இளம்

பச்சைக் கிளிகளுடன் பேசி மகிழ்வேன்.

கங்கை நதிக்கரையில் மூழ்கியெழுவேன் - பின்பு

காணும் மதுரைநகர்க் கோடி வருவேன்

சங்கப் புலவர்களைக் கண்டு மகிழ்வேன் - அவர்

தம்மைத் தலைவணங்கி மீண்டு வருவேன்.

செம்பொற் சிலம்புடைத்த செய்தியறிந்து - அங்குச்

சென்று கசிந்தழுது நொந்து விழுவேன்

அம்பொன் உலகமிர்து கண்டனேயடா - என்ன

ஆனந்தம் ஆனந்தம் கண்டனேயடா.

கால்கள் குதித்துநட மாடுதேயடா - கவிக்

கள்ளைக் குடித்தவெறி ஏறுதேயடா

நூல்கள் கனித்தமிழில் அள்ளிடவேண்டும் - அதை

நோக்கித் தமிழ்ப் பசியும் ஆறிடவேண்டும்.

தேவர்க் கரசுநிலை வேண்டியதில்லை - அவர்

தின்னும் சுவையமுது வேண்டியதில்லை

சாவில் தமிழ் படித்துச் சாகவேண்டும் - என்றன்

சாம்பல் தமிழ் மணந்து வேகவேண்டும்

வாழ்க்கைக் குறிப்பு.

பிறப்பு : 19.10.1921

தந்தை : தும்பளை, கணபதிப்பிள்ளை.

தாய் : மாவிட்டபுரம், தெய்வானைப்பிள்ளை

ஆரம்பக்கல்வி : காங்கேசன் துறை நடேஸ்வராக்கல்லுரி.

தந்தையாரிடம் வானியலும் சொதிடமும் சிவப்பிரகாச தேசிகரிடமும் சுப்பிரமணிய சாஸ்திரிகளிடமும் பாலசுந்தரக்குரக்களிடமம் சமஸ்கிருதக்கல்வியும் பயின்றார்.

1936 – 1937: இடை நிலைக்கல்வி : பருத்தித்துறை சித்திவிநாயகர் வித்தியாலயம் மற்றும் ஹாட்லிக்கல்லூரி.

1938 – 1940: உயர் கல்வி : பரமேஸ்வராக் கல்லூரி

30.09.1941: மதுரைப்பண்ணடிதர் பட்டம் - இலங்கை, இந்தியா இரு நாடுகளிலும் முதன்மைச்சித்தி

1946 - 1945: சுவாமி விபுலானந்தருக்கு ஆராய்ச்சித்துணைவர்

1946 : நீர் கொழும்பு St Mary's College இல் கணித ஆசிரியர்.

1947 – 1959: உடுவில் மகளிர் கல்லூரியில் கணித ஆசிரியர், தமிழ் சிறப்புப் பட்டம்

26.08.1949: திருமணம்

1960: பரமேஸ்வராக்கல்லூரியில் கணித ஆசிரியர்.

1961: யாழ் இந்துக்கல்லுரியில் தமிழாசிரியர்

1962- 1965: யாழ்,மத்திய கல்லூரி கணித ஆசிரியர்

1965 – 1967: அரசினர் பாடநூற்சபை எழுத்தாளர்.

1967 - 1981: பலாலி ஆசிரியர் கலாசாலை உளவியற் பேராசிரியர்

1978: M Phil in Psychology (London)

2001: கலாநிதிப்பட்டம் (யாழ் பல்கலைக்கழகம்)

21.03.2008: மறைவு.

எழுதிய நூல்கள் மற்றும் ஆராய்ச்சிக் கட்டுரைகள்.

1. ஆனந்தத்தேன் (கவிதை) 1955

2. தியாக மாமலை வரலாறு (1959)

3. யாழ்ப்பாணக்காவியம் (1998)

4. தமிழர் யாழியல் - ஆராய்ச்சி (1967)

5. மஞ்சு காசினியம் : இயங்கு தமிழியல் (2001)

6. Fundamentals of Tamil Prosody (2002)

7. இலங்கைக் காவியம் : பருவப் பாலியர் படும்பாடு (2002)

8. மஞ்சு மலர்க்கொத்து (சிறுவர் பாட்டு) (2003)

9. எடுத்த மலர்களும் கொடுத்த மாலையும் - கவிதை (2004)

10. S.J.V. Chelvanayaham ( In Print)

கட்டுரைகள் கவிதைகள்

#

தமிழன் (மதுரை) சக்தி ஈழகேசரியில் இருபதுக்கு மேற்பட்ட சிறுகதைகள் ஈழகேசரியில் தொடராக வெளிவந்த அன்னபூரணி என்ற முழு நாவல் - (1942) Ceylon Daily News இல் உளவியற் கட்டுரை.

#யாழ் பல்கலைக்கழக வெள்ளி விழாவின்போது சமர்ப்பித்த வானியல் (ஆராய்ச்சி)

#

ஆரிய திராவிட பாஷாபிவிருத்தி சங்கத்தில் படிக்கப்பட்ட தமிழ் ஒலி மூலங்கள். (1989)

#

கலாநிதி கு.சிவப்பிரகாசம் நினைவாக வாசிக்கப்பட்ட உளவியல் அடிப்படையில் உவம இயல். (1990)

#

யாழ் பல்கலைக்கழகத்தில் வாசிக்கப்பட்ட இடைச்சொல் பற்றிய மூன்று எடுகோள்கள் (1991)

முதலிய எண்ணிறைந்தவை

பெற்ற விருதுகள்.

1. சாகித்தியரத்ன - இலங்கையில் இலக்கியத்துக்க வழங்கப்படும் அதியுயர் விருது (199)

2. சம்பந்தன் விருது (2001)

3. வட - கீழ் மாகாண ஆளுநர் விருது (2003)

4. தந்தை செல்வா நினைவு விருது (2004)

5. இலங்கை இலக்கியப்பேரவை விருது (2004)

5. கலாகீர்த்தி தேசிய விருது (2005)

6. இவைதவிர கவிதைக்காக தேசிய மட்டத்திலும் மாகாண மட்டத்திலும் பலமுறை பரிசு பெற்றவர்.

இவரைப் பற்றிய சில குறிப்புகள் முகனூல் பதிவிலிருந்து: